BETONG, 24 Feb: Kaunsil Lada Malaysia (MPB) dikearapka seruran nyaga rega makit lada di menua tu, ku Dato Sri Stephen Rundi Utom.
Menteri Industri Pemakai, Komoditi Enggau Pemansang Wilayah Sarawak nya madah, pengawa nya mesti diberi perati berat dikena nentuka raban pekebun mit lada bulih penguntung nitihka pematut, senutuk enggau pengeransing sida, seraya nyeliahka orang tengah beambi ulih.
“Diatu sida (Kaunsil Lada Malaysia) tu kekadang (atur) berubah laban enti perintah berubah pala (chairman) pan berubah.
“Nyadi enti ulih kitai beratika iya mesti deka nyaga sereta ulih ngawal rega.
“Raban MPB tauka Kaunsil Lada tu mesti nyaga tudah ke nyual (pekebun), semua udah nya iya deka untung iya nya orang tengah (pemeli lada) nadai pun tauka kebun lada tang duit mayuh,” ku iya.
Iya mansutka jaku nya rambau bejaku ba mua mayuh nyerumba Program Randau Pemansang Industri Lada ba Rumah Panjai Joseph Sanda, Jambu Kerampak di Layar ditu kemari.
Nitihka ripot ari MPB, Sarawak nyadi pengeluar lada pemadu besai di menua tu sereta ngembuan urung 38, 277 iku pekebun lada ti ngemansangka tanah pemesai 8,015 hektar.
Pia mega, ba taun siti nyin kemari, Sarawak mujur ngeluarka penyampau 31, 900 tan metrik lada ke alai bagi menua Betong nyadi pengeluar lada pemadu besai.
Bisi 2, 338 iku pekebun lada ti nanam lada ba tanah pemesai 659.7 hektar.-TVS
