SARATOK, 22 Feb: Sapit Menteri Pemansang Indu, Anak Mit enggau Pengelantang Komuniti Sarawak Datuk Mohd Razi Sitam ngasaika pemidang kedu Tuai Pemegai Menua (TYT) Nengeri Sarawak ke mega kedu Kepala Menteri Sarawak Tun Pehin Sri Abdul Taib Mahmud siti pengelenyau besai ngagai Sarawak.
Ku iya, niang Tun Pehin Sri Abdul Taib siku ari pemungkal ngagai penegap politik enggau pemansang sepanjai maya di Bumi Kenyalang sepengudah iya bekuasa ngiring Perintah Negeri kenyau taun 1981.
“Kitai chukup sinu enggau pemidang Tun Pehin Sri Taib Mahmud, kedu TYT enggau mega kedu Kepala Menteri Sarawak kena pagi tadi (Hari Tiga) laban Tun Pehin Sri Taib Mahmud endang siku Negarawan sereta tukuh ke chukup dibasa.
“Iya mega siku tukuh tuai ke udah mayuh mai ubah ngagai Nengeri Sarawak kenyau ngiring Perintah Sarawak ba taun 1981 enggau dalam timpuh 32 taun iya nyadi Kepala Menteri,” ku iya maya dirandau pengari TVS lebuh Hari Tiga.
Kenu ku Mohd Razi, Tun Taib mega udah bejalaika polisi politik pemansang di Sarawak ke mega nyadi pemungkal pemansang sepanjai maya ngagai Sarawak.
“Bekau ari pemansang nya udah ditampung raban tuai ke bukai baka niang Pehin Sri Tok Nan enggau ke diatu Datuk Patinggi Tan Sri Abang Jo nyentuk Sarawak diatu udah diaku Bank Dunia nyadi nengeri bepenatai pemisi tinggi.
“Jasa enggau perambu niang Tun Taib sekumbang ke nyadi Kepala Menteri deka seruran dikeingat rayat Sarawak kaban iya mayuh mai ubah landskap politik pemansang ungkup nengeri tu,” ku iya. – TVS.
