KUALA LUMPUR, 21 Feb: Pemidang kedu Tuai Pemegai Menua (TYT) Nengeri Sarawak, Tun Pehin Sri Abdul Taib Mahmud pengelenyau ke besai menua, lebih agi Sarawak.
Sapit Menteri Besai, Datuk Seri Fadillah Yusof nengah laman Facebook iya meri penyinu ati ngagai niang Tun Taib sebilik sereta madahka pemidang Tun meri empas ngagai nengeri tu enggau diasaika rayat pupu bansa.
“Tun Taib ke mega kedu Kepala Menteri Sarawak sebedau tu kala gawa nyadi menteri ba renggat Perintah Besai sebedau iya pulai ke Sarawak,” ku iya madah.
Fadillah ke mega Menteri Ubah Kuasa enggau Transformasyen Ai (PETRA) nerangka, Tun Taib siku Kalu Menua ti udah nempa mayuh pemujur dalam ngemansangka Sarawak.
Nangkan ke nya, siku agi Sapit Menteri Besai Datuk Seri Dr Ahmad Zahid Hamidi mega mantaika penyinu ati berindik ari pemidang niang Tun Taib.
“Niang Tun Taib udah mujur bejalaika tangkup pengawa dalam pekara administrasyen enggau nyungkak pemansang Sarawak nyentuk diatu,” ku iya madah nengah laman Facebook.
Tandu Zahid, iya ngembuan mayuh pengingat lebuh begulai enggau Tun Taib sereta madahka Tun siku tuai ti nyamai enggau begulai sereta ngemeratka pengelantang rayat.
Tun Pehin Sri Abdul Taib Mahmud udah midang urung pukul 4.40 pagi Hari Tiga.
Nampung berita ari Unit Komunikasi Awam Sarawak (UKAS), tubuh niang dijangka datai lemai hari tiga ari Kuala Lumpur sereta deka terus dibai ke rumah iya di Demak Jaya, Jalai Bako.
Nangkan ke nya, tubuh niang deka dibai ngagai begunan Kunsil Nengeri (DUN) kena 22 Februari (Hari Empat) ngambika bala mayuh ulih meri basa kepenudi berengkah ari pukul 8 pagi nyentuk ke 11.30 pagi.
