KUCHING, 21 Feb: “Padah ngagai presiden kita, ambi Mawan baru”, pia ku kedu Tuai Pemegai Menua Sarawak niang Tun Pehin Sri Abdul Taib Mahmud.
Kaban Kunsil Nengeri (ADUN) Pakan Tan Sri William Mawan Ikom madahka antara kenang ti dilansa iya senentang pemanah niang Tun Taib iya nya ngasuh presiden sekeda parti ngambi baru Tan Sri William nyereta parti.
“Lebuh aku bisi dua kali alah suba maya bediri, bisi sekeda gerup deka ngasuh aku bediri tang enda nyadi ketegal ke enda ulih nerima penemu aku. Udahnya aku lalu dibuai parti, nya alai niang Tun Taib lalu madahka ngagai sida ngasuh ngambi aku baru laban aku siku orang ti chakah gawa,” ku iya.
Nangkan ke nya Mawan ke mega penyanding penemu Opis Menteri Pengelikun Pemakai, Komoditi Enggau Pemansang Wilayah Sarawak madahka entara pemakai ti dikerinduka iya, iya nya ikan kilat guring.
“Enti ba rumah aku suah meda iya makai ikan kilat guring. Maya ba Pakan suba lebuh iya nemuai kin bisi mega makai ikan kilat guring,” ku iya madah lebuh dirandau pemberita TVS.
Kelimpah ari nya Mawan chukup beterima kasih ngagai niang Tun Taib laban ketegal penaluk iya ke rayat, menua Pakan udah nyadi pelilih menua ba taun 2022.
Kedu Tuai Pemegai Menua Sarawak niang Tun Pehin Sri Abdul Taib Mahmud siku orang ti chakah ngereja pengawa, siru sereta ngembuan runding ti tajam dalam strategik pemansang menua Sarawak.
Niang Tun Pehin Sri Abdul Taib Mahmud midang di Kuala Lumpur urung pukul 4:40 minit pagi tadi. – TVS
