SARATOK, 20 Feb: Mensia mayuh lebih agi ke diau di Saratok diperansang terus ngerijister diri ba Sistem Pengkalan Data Besai (PADU).
Pegawai Opis Pemadah Pelilih Menua (JAPEN) Pampang Saratok Florence Sebastian Unting madahka mensia mayuh di Saratok enda ibuh irau senentang pengelikun penerang diri sida dalam sistem PADU laban sistem nya diatu dijamin likun.
“Juluk Opis Pemadah Saratok deka meda mensia mayuh terus ngerijister diri ba Sistem PADU.
“Opis JAPEN bisi nyendiaka palan internet dikena mantu rayat ke diau di pelilih Saratok ngerijister PADU.
“Nyadi mensia mayuh enda ibuh irau enggau ke penerang ti tinggal lebuh udah ngisi PADU laban sistem nya tegap enggau likun,” ku iya.
Florence mansutka penerang nya maya dirandau pengari TVS Saratok ba Palan Penerang Rayat Opis Pemadah Pelilih Menua Saratok ditu, pagi tadi.
Ku terang iya kenyau dibuka kena 2 Januari nyentuk ke sehari tu semina urung 500 iku orang udah ngerijister padu di Palan Penerang Rayat Opis Pemadah Saratok.
Dikena nambahka pemereti ati mensia mayuh di saratok bekaul enggau ngerijister PADU raban JAPEN Saratok udah ngelalau mensia mayuh nengah Program ‘Info Of Wheel’ sechara betimpai mua.
Promosyen mega diatur nengah laman media rama baka Facebook, Twitter, Instagram enggau akaun Tiktok opis nya.
Kelimpah Palan Penerang Rayat JAPEN, mensia mayuh mega ulih ngerejister PADU ba ngelawa Palan Ekonomi Digital (PEDi) di Kubu Ranee Saratok.-TVS
