DEBAK, 20 Feb: Sitak Kunsil Nengeri (DUN) Saribas diatu udah disikap 100 peratus perengkaguna infrastruktur pemun baka bekal ai beresi, jalai raya enggau bekal karan 24 jam.
Kaban Kunsil Nengeri (ADUN) Saribas Datuk Mohd Razi Sitam madah, pekara nya udah mujur dijapai sepengudah dua penggal iya mangku pengawa nyadi pengar rayat ba DUN Saribas.
“Dua penggal aku udah nyadi pengari rayat di Saribas kami udah mujur nyapai 100 peratus perengkaguna pemun.
“Kami udah bisi karan, bekal ai beresi semina kekadang karan kami tu nemu padam kediri. Ambika chunto baka pagi tadi kitai nadai karan ngujungka bala ke ngatur program angat nadai karan,” ku iya.
Mohd Razi mansutka pekara nya maya Program Randau Solidariti Komuniti (PRSK) ke dipenyadi Sapit Premier Sarawak Datuk Amar Douglas Uggah Embas di Rumah Lingan Sait, Singalang ditu empai lama.
Ku iya, pemujur nya asil kerejasama penuh semua pengari rayat ba Parlimen Betong dalam nentuka rayat di Saribas ngasaika perengkaguna infrastruktur ke menyana.
Pemujur nya mega asil sukung rayat ngagai perintah Gabungan Parti Sarawak (GPS) dalam merintah Sarawak ngelama tu.
Nya alai, iya nesau mensia mayuh lebih agi di Saribas terus betunggang sukung ngagai pengari rayat GPS awakka mayuh agi pemansang ke udah enggau benung dilanggur ulih dikemujur dudi hari.-TVS
