DEBAK, 20 Feb: Sitak Parlimen Betong dikeandal nyapai juluk 90 peratus bungkur internet 4G manggai ujung taun tu.
Kaban Parlimen Betong Dr Richard Rapu madah bepelasarka ripot ari Komiti Komunikasyen enggau Multimedia Malaysia (SKMM) tikas bungkur internet ba sitak nya diatu udah manggai 70 peratus ba palan ke mayuh pengani.
“Bepelasarka ripot ari SKMM diatu sitak Parlimen Betong ke mayuh diuan mensia udah nyapai bungkur internet 70 peratus.
“Enti semua tiang pemanchar telekomunikasyen udah disikap menyana aku andal kitai (Betong) ulih nyapai juluk 90 peratus bungkur internet 4G,” ku iya.
Dr Richard mansutka pekara nya rambau Program Randau Solidariti Komuniti (PRSK) diatur Kaunsil Pemansang Rama Sarawak di Rumah Lingan Sait, Singalang ditu apin lama ke udah.
Ku terang iya, naka diatu urung 20 buan agi tiang pemanchar telekomunikasyen bedau disikap enggau kereban pemanchar ba Betong.
Nya alai, juluk nya chukup senutuk dikena nentuka genap peranak lebih agi raban nembiak sekula ngasaika akses internet ngambika sida nyamai ngaduka pengawa sekula, ku iya.-TVS
