MIRI, 19 Feb: Raban orang bumai dilalau ngemeranka chara saintifik enggau moden dalam ngemansangka utai tanam sida.
Kaban Kunsil Nengeri (ADUN) Senadin, Dato Sri Lee Kim Shin madah tu nyadi siti chara dikena nyungkak asil utai tanam di Sarawak awakka ulih dieksport ngagai menua luar.
“Aku ngelalau raban orang bumai enggau pekebun patut chakaka agi ngatur chara sida nanam sayur, buah, betupi enggau ke bukai.
“Sida patut nitih chara ke lebih saintifik enggau nguna teknologi sereta injin ngamika sida ulih nyungkak agi asil ari utai tanam sida,” ku iya.
Kim Shin ke mega Menteri Pengangkut Sarawak mansutka pekara nya maya Aum Ninting Taun Gerempung Pekebun Bagi Menua Miri Sarawak lebuh Hari Minggu.
Kim Shin mega meransang sida patut ngatur Program Raun Seraya Belajar tauka ngulu Ekspo ngagai menua luar baka ke menua China.
Kebuah pia laban menua nya ngembuan mayuh injin dikena bekebun, teknologi baru enggau menua mayuh benih ke ulih nyungkak asil utai tanam raban pekebun.
Berebak enggau nya, gerempung nya mega bisi minta subsidi enggau tanah endur bekebun ari perintah dikena ulih numbuhka palan pengeluar buah enggau sayur dikena nangkup peminta rayat.-TVS
