SPAOH, 19 Feb: Bisi 50 iku nembiak di sitak Kunsil Nengeri (DUN) Bukit Saban udah nerima insentif bantu pelajar di Palan Servis ADUN Bukit Saban bedau lama ke udah.
Sapit Premier Sarawak Datuk Amar Douglas Uggah Embas madahka, bantu nya nyadi sebagi ari inisiatif dikena nentuka tetiap nembiak ke patut ari sitak DUN nya enda tinggal ari nampung pelajar ba renggat ke lebih tinggi ketegal penanggul belanja.
Uggah ke mega Kaban Kunsil Nengeri (ADUN) Bukit Saban madahka, penyeranta ukai nyadika dalih enda nampung pelajar ngagai tikas ke lebih tinggi ti ulih nyamin peluang gawa enggau ngubah pengidup ke lebih menyana dudi hari.
”Penyeranta ukai nyadi dalih enda nurun sekula laban enti kita beratika orang ke baka aku (empu) anak pekebun, udah abis sekula bulih pengawa ke lebih menyana.
“Pia mega Kaban Parlimen (Betong, Dr Richard Rapu) enggau Sekretari aku semua nya anak pekebun,” ku iya.
Uggah mansutka penemu nya rambau Pengawa Nyuaka Insentif Pelajar ngagai 50 iku nembiak ari DUN Bukit Saban deka deka nampung pelajar ngagai renggat Bachelor Degree enggau Diploma ba sebengkah pengawa ke diatur kemari.
Sama bisi datai ngulu pengawa nya nya Kaban Parlimen Betong, Dr Richard Rapu, Sekretari Politik Ngagai Premier Sarawak Roselind Mapong Sabai enggau ke bukai.-TVS
