DEBAK, 19 Feb: Semua rayat ba renggat baruh diperansang terus bekerejasama dikena nentuka genap langgur pemansang ke udah diperambu perintah nadai penanggul dikemujur.
Sapit Premier Sarawak Datuk Amar Douglas Uggah Embas madah, chara perintah lebih agi di bagi menua Betong semampai tebuka runding sereta mendingka buah penemu ari rayat nengah pengawa ngatur aum awakka pekara ke nekul ulih teputar.
Ambika chunto ku iya, di Betong taja pan semua menua udah datai jalai tang pengari rayat ditu agi deka minta ditambahka agi jalai baru ungkup pengelantang rayat.
“Perintah tu ninting taun ba Kunsil Nengeri (DUN) tauka Parlimen kitai bisi baum.
“Nyadi tuju aum nya dikena ngelanggur program lalu ngiga agih belanja dikena ngemujurka sesebengkah program,” ku iya seraya madah di Betong diatu selampur menua udah datai jalai, bekal karan enggau ai.
Uggah ke mega Kaban Kunsil Nengeri (ADUN) Bukit Saban madah munyi nya maya Program Randau Solidariti Komuniti (RSK) di Rumah Panjai Lingan Sait, Sengalang ditu, kemari.
Rumah panjai Sengalang iya nya palan keterubah ari 33 bengkah palan ke udah dipilih endur ngemujurka RSK di selampur Sarawak.
Program RSK iya nya diatur penuh Kaunsil Pemansang Rama Sarawak dibaruh kemata Opis Menteri Pemansang Indu, Anak Mit Enggau Pengelantang Komuniti Sarawak.
Sama bisi datai Sapit Pemansang Indu, Anak Mit enggau Pengelantang Komuniti Datuk Mohd Razi Sitam, Kaban Parlimen Betong Dr Richard Rapu, Sekretari Politik Premier Sarawak, Roselind Mapong Sabai enggau ke bukai.-TVS
