DEBAK, 19 Feb: Rayat di menua pesisir dilalau patut ngelala sebarang pengawa enda menuku lebih agi bekaul enggau dadah engka bisi nyadi ba rumah panjai sida.
Sapit Premier Sarawak, Datuk Amar Douglas Uggah Embas madah, pengawa ke baka nya mesti dipunas sereta ditagang tumu ngambi enda nyadi penyakit lebih agi ngaul nembiak bujang dara di rumah panjai.
“Orang tu (pengidar dadah) baka kitai ke nginti dini lubuk mayuh ikan kia ke sida nginti.
“Nya kebuah kitai ba rumah panjai ari penatai pemisi kitai kereja dia penatai pemisi kitai pan betambah.
“Beduduk ari nya, sida sigi nyidi baka sampuk nama iya udah lekat (teparuk gian dadah) chukup tusah.
“Nya alai, jaga manah anak kita enti iya bisi nyelai enda tau enda bai ngagai lutur tauka ngelawa AADK (Ejensi Anti Dadah Nasional),” ku iya.
Uggah ke mega Kaban Kunsil Nengeri (ADUN) Bukit Saban mansutka pekara nya maya program Randau Solidariti Komuniti (RSK) di Rumah Lingan Sait, Sengalang ditu kemari.
Program RSK nya diatur berengkah 16 nyentuk 18 Februari tu tadi.
Entara barang randau ke bisi dipejurau nyerumba program tu iya nya Taklimat Pemesai Guna Penyerakup Dalam Komuniti, Taklimat Pengelikun Mensia Mayuh Enggau Nagang Jenayah, Taklimat Kanun Tanah Nengeri Sarawak enggau Licha Pasal Bantu Ari Perintah Sarawak.-TVS
