BETONG, 18 Feb: “Aku deka bagi menua betong nyadi sebagi ari mengeri ke pemadu beresi ba Malaysia udah tu ila”, pia ku jaku Datuk Amar Douglas Uggah Embas nuju orang gawa perintah di bagi menua Betong lebuh Hari Enam.
Sapit Premier Sarawak nya madah dikena nyapai saran nya raban orang gawa perintah di Betong patut bebendar agi bejalaika pengawa diri empu.
“Tu mih siti pemar besai ungkup chairman enggau kaban komiti nyengkaum Yang Berhormat Dato Gerald Rentap enggau Yang Berhormat Datuk Mohd Razi.
“Taja seduai ukai nyadi siti komiti tang seduai ulih bekerejasama enggau Residen baka ni begulai nengah sesebengkah program lebih agi baka ni deka mytarka penanggul rayat,” ku iya.
Uggah ke mega Kaban Kunsil Nengeri Bukit Saban madah munyi nya maya Pengerami Makai Lemai Pengereja Pengawa Perintah Bagi Menua Betong di Diwan Lumba Tan Sri Datuk Amar Stephen Kalong Ningkan ditu lebuh Hari Enam.
Kelimpah ari nya, semua ejensi perintah di bagi menua mega patut nentuka semaya perengkaguna enggau infrastruktur baka jalai raya enggau ke bukai patut seruran manah ungkup pengelantang mensia mayuh.
Urung 36 ejensi perintah di Betong bisi ngulu pengerami nya.
Sama bisi datai Sapit Menteri Nembiak, Lumba enggau Pemansang Pedagang Sarawak Dato Gerald Rentap Jabu, Sapit Menteri Pemansang Indu, Anak Mit Enggau Pengelantang Komuniti Sarawak Datuk Mohd Razi Sitam, Kaban Parlimen Betong Dr Richard Rapu Enggau Kaban Parlimen Batang Lupar Mohd Shafizan Kepli.-TVS
