BALAI RINGIN, 18 Feb: Rayat di sitak Balai Ringin diperansang nguna penemu ke diulih ari Kus Ngintu Kebun Rian dikena ngerembaika dagang rian.
Kaban Kunsil Nengeri (ADUN) Balai Ringin Datuk Snowdan Lawan madah untung ari nyual buah rian chara komersial deka ngasilka penatai pemisi ke mayuh.
Ku snowdan nyema buah rian rayat lokal ulih dieksport ke menua luar baka singapore iya tentu deka ngasilka penatai pemisi ke belipat dibanding enggau rega ke dijual sida ba makit lokal.
“Tang iya ke beguna aku ngasai rian tu enti kitai pintar nguna peluang nanam enggau ulih eksport ke menua luar iya deka meri untung ke chukup besai.
“Ambika chunto enda ibuh nyema jauh, enti di Singapore rega rian sekilo urung 24 dolar….reti nya tiga kali lipat, 24 dikali enggau 3.5 (mata duit kitai) nyadi rega rian dijual dedin nyau deka manggai RM100 sekilo,” ku iya.
Iya madah munyi nya pengudah bejadika Kus Ngintu Kebun Rian Renggat 1/2024 diatur ba Gerija St Andrew Kampung Ensebang Kuari Balai Ringin, kemari.
Kus Ngintu Kebun Rian Renggat Keterubah nya dipasuk urung 122 iku penyereta datai ari peranak rumah panjai enggau genturung pendiau ke diau besemak.
Ku iya, nengah kus ke diatur nya mensia mayuh ulih belajar senentang chara nanam enggau ngintu buah rian ngambika nyapai kualiti baka ke dipinta makit luar.
Snowdan mega ngelalau rayat di Balai Ringin nguna manah tanah ke dikemisi sida dikena ngemansangka pengawa nanam rian laban nya diperati ulih mantu nyungkak ekonomi sida. -TVS
