SRI AMAN, 18 Feb: Pengawa ngemanahka agi atur bejalai bebala mayuh Chap Goh Mei di Sri Aman ulih ngujungka aktiviti nyadi siti program ke ulih matak penatai temuai luar datai ngusung mengeri nya.
Kaban Parlimen Sri Aman Dato Sri Doris Sophia Brodie madah, semua raban patut bekerejasama nentuka pengawa bejalai bebala mayuh nya siti program ke tebilang ba Sri Aman dudi hari.
Ku iya, nengah perambu ke terang sereta berurun dikearap ulih nempa siti agi produk dagang temuai baru ke ngaul Taun Baru China.
“Nyadi taun tu kitai deka berami begulai kena 24 Februari iya nya ngintu Hari Chap Goh Mei bejalai bebala mayuh.
“Aku andal ulih matak mayuh temuai datai ke Sri Aman laban nya nyelai ungkup Sri Aman.
“Nya alai, kitai patut ngenegapka iya taja pan nya semina ngerami Chap Goh Mei tang tegal nama Sri Aman kitai patut bekerejasama ngambika pengerami tu terus tebilang enggau lati agi dudi hari.
“Kelimpah ari nya, ulih dikena matak temuai datai ke Sri Aman laban (temuai) deka meda pengerami Chap Goh Mei,” ku iya.
Iya madah munyi nya maya Pengerami Beserumpu Ngintu Taun Baru China enggau bejadika Pengerami Chap Goh Mei Renggat Sri Aman Taun 2024 ba laman Tepikong Ciyun ditu, kemari.
Tandu iya enda mayuh pelilih ba Sarawak bisi ngatur program ke baka nya ninting taun lalu tu meri pengelebih ngagai Sri Aman patut ngetanka siti budaya ke ulih nyadi produk dagang temuai di menua nya.-TVS
