PUSA, 17 Feb: Bala penguna jalai raya lebih agi di nengeri tu dilalau ngubah ulah anang kelalu ngerunding diri empu aja maya deriba ba jalai raya.
Sapit Menteri Pengangkut Malaysia (MOT) Datuk Hasbi Habibollah madah, ulah ngerunding diri empu enggau ngelanggar undang-undang jalai raya kebendar ulih ngemedis diri empu enggau ngeruga pengelikun orang bukai.
“Sebedau tu ari Kuching ke Serian diperati penusah aksiden nyadi ketegal ulah enchuri nengah jalai tu (bepusin P) enggau ke bukai.
“Kitai ngarapka semua penguna jalai terus dilalau sepanjai maya nengah media rama enggau ke bukai laban tu endang iklan (lalau) iya.
“Kitai ngarapka semua rayat meri perati berat bekaul enggau pengelikun diri empu, diri sebilik enggau orang bukai,” ku iya.
Hasbi mansutka penemu nya maya meri timbal bekaul enggau ulah penguna jalai ke suah sengapa endur bepusin P ba Jalai Raya Pan Borneo pengudah Program Bantu MyLesen (B2) Renggat Parlimen Batang Lupar diatur ditu, pagi tadi.
Sama bisi datai Kaban Parlimen Batang Lupar Mohd Shafizan Kepli, Direktor Opis Pengangkut Darat (JPJ) Malaysia Sarawak Norizan Jili, Sapit Residen Betong Mahra Salleh enggau ke bukai.-TVS
