BALAI RINGIN, 17 Feb: Agih sepenyampau RM55 juta udah dikemendar dikena ngemanah enggau nangkir pasar balai ringin sereta tebing ai ba pasar nya.
Kaban Kunsil Nengeri (ADUN) Balai Ringin, Datuk Snowdan Lawan madah asil ari penembu projek nya jemah dikeandal ulih nyungkak aktiviti ekonomi di pelilih nya.
Ku iya, agih belanja nya udah dikemendar dibaruh Ejensi Penyeraris Pemansang Greater Kuching (GKCDA) lalu proses pejalai projek benung ditusun.
“Ari perati penuh aku meda kitai deka nyungkak ekonomi ditu (Balai Ringin).
“Siti ari perambu deka digaga aku iya nya deka nangkir Pasar Balai Ringin, udah nya ngaga baru Tebing Ai ba pasar baru nengah agih belanja ke udah dikemendar dibaruh Ejensi Penyeraris Pemansang Greater Kuching (GKCDA) nengah agih belanja sepenyampau 55 juta,” ku iya.
Iya mansutka pekara nya maya bejadika Kus Ngintu Kebun Rian Renggat 1/2024 ba Balai Ringin pagi tadi.
Ku terang Snowdan, pemansang nya jemah deka ngujungka lebih mayuh palan endur bejual, dipelaba bisi 40 bansal, tamu enggau kedai bejual bemacham barang disedia ba ringkat atas begunan nya.
Bela deka ditumbuhka ba Pasar Balai Ringin iya nya palan bejual krafjari ngambika bisi alai mensia mayuh ke diau besemak bejualka produk krafjari sida.-TVS
