BINTULU, 15 Feb: Kilang ammonia ti deka digaga di Bintulu ari pengawa meranak puku ulih nyendiaka peluang gawa ti begaji besai, lebih agi ngagai anak Sarawak.
Premier Sarawak, Datuk Patinggi Tan Sri Abang Johari Tun Openg madahka, dalam taun 2024 tu pemeranak puku ari menua luar deka ngaga kilang ammonia di Bintulu ke nguna kos urung 3 bilion USD Dollar.
“Kilang tu begunaka beratus iku pengereja pengawa enggau meri gaji ke besai.
“Peluang gawa ti diguna ditu baka injinir enggau tebangkar dalam bidang urus atur dikena bejalaika operasyen kilang ammonia tu semak enggau kilang metanol,” ku iya madah rambau Program Rumah Tebuka Taun Baru China ke diatur DUN Tanjung Batu enggau SUPP Pampang Bintulu.
Nangkan ke nya, Abang Johari nerangka siti agi pengawa meranak puku ti deka numbuhka kilang grafit ti nguna kos penyampau 1.5 bilion USD Dollar di Bintulu.
“Kilang tu ila keterubah digaga ba menua Asia Tenggara ti ngeluarka grafit.
“Grafit tu dikena ba dalam injin kerita ti nguna hidrogen. Nyadi enti nyema mayuh menua bukai ngalih ari nguna kuasa kereban api fosil ngagai hidrogen sida begunaka grafit tu,” tandu iya.
Iya madahka, maya nya ila Sarawak bisi daya nyadi pengeluar grafit keterubah di Asia Tenggara, sereta kilang nya keterubah bisi di Bintulu. – TVS
