KUCHING, 14 Feb: Pemansang nengeri enggau rama patut diambi kira ari mayuh bengkah aspek sechara holistik nyengkaum tangkup pengawa teknologi enggau injinir dikena nangkup peminta rayat di nengeri tu.
Premier Sarawak Datuk Patinggi Tan Sri Abang Johari Tun Openg madahka dikena nyapai timpai pemansang ekonomi, pengawa nambahka tikas pengidup mega dikemerat nengah teknologi enggau injinir.
“Tu ukai semina pejuluk pengawa berunding, tu endang nyata ke alai kitai nyeliah utai ke enda ditemu, ngambika ngembuan inovasyen ukai konvensional, sereta dikena nentuka kitai ulih nyendiaka komuniti kitai ti meruan, chakah sereta meri timbal ke manah,” ku iya.
Abang Johari bejaku munyi nya nengah teks jaku iya ti dibacha Sapit Menteri Infrastruktur enggau Pemansang Penyangkai Kapal, Datuk Aidel Lariwoo ba Pengerami Bejadika Aum Antarabansa Injinir UNIMAS ke-15 (EnCON) 2024 di sebuah hotel tebilang ditu pagi tadi.
Nengah aum nya ku iya madah sadang penemu enggau pengawa bekunsika penemu sepemanjai aum nya dipejalaika berengkah ari 14 nyentuk ngagai 16 Februari tu ulih dikena ngemansangka Sarawak ngambika juluk sereta aspirasyen nengeri ulih dijapai.
“Penemu engau inovasyen ti ditempa nengah aum tu deka nyungkak pemansang infrastruktur ke pemadu beguna, ari jalai enggau jematan ngagai rentayan digital, siti ari tulang belakang ekonomu enggau pengidup kitai besehari-sehari.
“Tu deka mai ngagai pemansang kuasa ke ulih dikemaru, setipak enggau komitmen kitai ngagai pemansang ke meruan sereta nyaga rampa menua,” ku terang iya.-TVS
