DEBAK, 14 Feb: Perintah Besai dikearapka terus meri kerejasama manah dalam ngemujurka semua projek ke udah dilanggur Perintah Nengeri Sarawak ba premis sida di nengeri tu.
Sapit Menteri Pemansang Indu, Anak Mit Enggau Pengelantang Komunitu Sarawak Datuk Mohd Razi Sitam madah, sigi enda patut nyema juluk perintah nengeri deka mantu perintah ngemanah perengkaguna ba premis ke dipenggi sida puntan ketegal sekeda atur taja pan pekara nya ulih diperunding ke pemaik rayat.
“Kitai udah berandau enggau Opis Pengerai Nengeri ngambi ngemendarka lebuh kitai nguna belanja ari perintah nengeri ngaduka premis Perintah Besai.
“Enti nitih, pekara nya nadai pulaika penanggul tang kitai patut nitih chara rasmi enggau Opis Pengerai ke nyadi penguna ngagai projek tu.
“Kebendar kitai deka mantu ngemanah perengkaguna ba sitak aku (Saribas) lebih agi enti bisi penanggul aku ngasai nya utai ke enda patut mih…,’ku iya.
Razi ke mega Kaban Kunsil Nengeri (ADUN) Saribas madah munyi nya ngagai media pengudah Pejalai Ngabas Perambu Taba Projek Ngaga enggau ngemanah begunan Klinik Pengerai Debak pagi tadi.
Ku iya, beduduk ar penanggul nya ngujungka perengkaguna ba premis perintah besai di nengeri tu nyau balat luya sereta ulih ngeruga pengelikun penguna.
Sama bisi datai Pegawai Opis Pengerai Bagi Menua Betong, Dr Mohamad Norhaizan Ahmad Narawil, Pegawai Pengatur Pengawa Khas Ejensi Pemansang Bagi Menua Betong, Abang Mohamed Abang Turkey enggau ke bukai.-TVS
