SARATOK, 10 Feb: Projek Betanam Betupi Ngemanah Jalai Kebun ba sitak Kunsil Nengeri (DUN) Kalaka ke dibaruh kemata Ejensi Pemansang Bagi Menua Betong (BDDA) diatu udah berengkah.
Kaban Kunsil Nengeri (ADUN) Kalaka Mohd Duri madah, taba projek fasa keterubah beungkus RM2.2 juta nya udah diserah ngagai kunteriktor ke bekaul.
“Taun nyin kemari lebuh kitai ngerintaika projek ke meri empas besai nyengkaum jalai enggau ngemanah infrastruktur ungkup jalai-jalai kebun.
“Kelimpah ngemanahka culvert enggau jalai batu.
“Nyadi peminta ari rayat ke diau besemak ba DUN N.38 Kalaka baka di sitak Jelupang enggau Nyiar kitai udah ngamatka peminta sida lalu sehari tu bisi diatur pengawa nyerahka taba (projek) beungkus RM2.2 juta agih ari BDDA renggat keterubah dipejalaika ba taun 2024,” ku iya.
Iya madah munyi nya maya Pengawa Nyerahka Chek Pampas Tanah Projek Jalai ari Kampung Kupang ke Simpang Bajau diatur ba Diwan Masyarakat Sri Krian ditu,kemari.
Palan Projek Betanam Betupi Renggat Keterubah ba DUN Kalaka tu iya nya di Sungai Ruan, Engkeley, Blok A, Bukit Jarau Jelupang enggau Jalai Ladang Bayang di Pelilih Mit Roban.
Udah nya ungkup renggat kedua urung RM20 juta diagih ungkup tuju ke sebaka iya nya dikena ngemujurka Projek Betanam Betupi di Perpat, Kupang, Paloh, Pagan enggau Saratok.-TVS
