KUCHING, 10 Feb: Opis Menteri Dagang Temuai, Industri Kreatif enggau Seni Pemerindang (MTCP) Sarawak enda ngenggaika nyema Pengerami Ngelaluka Pengabang Taun Baru China (TBC) Renggat Nengeri Sarawak diaku nyadi sebagi ari achara ninting taun.
Menteri MTCP, Dato Sri Abdul Karim Rahman Hamzah nerangka, pengerami nya deka dipasuk dalam Kalinda Achara Sarawak baka Pengerami Hari Raya Aidilfitri enggau Hari Gawai Dayak.
“Ba aku, aku endang nyukung laban aku meda pemanah iya sebedau tu ukai semina diatur ba renggat parti tauka gerempung tang tu keterubah diatur ba renggat nengeri.
“Nya alai, enda salah enti diatur ninting taun baka Hari Raya, Hari Gawai enggau ke bukai,” ku iya.
Iya mansutka jaku nya rambau dirandau media pengudah ngulu Pengerami Ngelaluka Pengabang Taun Baru China Renggat Nengeri Sarawak 2024 diatur ba Palan Konvensyen Borneo Kuching (BCCK) pagi tadi.
Nangkan ke nya, Karim ngasaika pekara nya deka dikemujur berengkah ari taun baru ila nyema iya dipasuk dalam kalinda awakka nyadi achara ninting taun di nengeri tu.-TVS
