SARATOK, 10 Feb:Pengudah lima taun nganti, pengani tujuh buah genturung pendiau ba sepanjai Jalai Kampung Kupang ke Simpang Bajau diatu udah ulih matak seput lantang beduduk ari jalai di menua sida deka digaga rembus ke Pasar Saratok.
Kaban Kunsil Nengeri (ADUN) Kalaka Mohd Duri madah, projek ngaga jalai sepanjai 16.9 kilometer nya deka ditinda ba suku kedua taun tu.
“Perais ungkup kita ke udah sabar nganti urung lima taun endur jalai tu diatu deka digaga.
“Tuju pengawa kitai lemai tu endang nadai utai bukai iya nya deka mayar pampas tanah lebih kurang pemanjai jalai tu 16.5 kilometer penyampau lot ke kena teresa iya nya ngaul 275 penerima sereta urung 163 iku sida ke nerima (pagi tu).
“Nyadi chek tu kami meri ngagai ngenap penerima pampas tanah,”ku iya maya maya Pengawa Nyerahka Chek Pampas Tanah Projek Jalai ari Kampung Kupang ke Simpang Bajau diatur ba Diwan Masyarakat Sri Krian ditu,kemari.
Ba pengawa nya, urung 163 pengempu tanah ari Rumah Rabiah, Rumah Andrew Kulih, Rumah Patih, Rumah Rengan di Selambong, Rumah Ambang, Entebu Jaya enggau Rumah Anau di Entebu bela nerima chek pampas tanah sida.
Penyampau semua pampas tanah ke disua tu iya nya RM1,196,378.74.-TVS
