SARATOK, 10 Feb: Genap bantu belanja ke diberi pengari rayat deka terus dipasuk ngagai akaun Gerempung Apai Indai enggau Pengajar (PIBG) Kolej Pom Enam Saratok (KTES) ngambika ulih dikena penuh ngemansangka akademik enggau perengkaguna ba kolej nya.
Prinsipal KTES, Omar Sharif Buseri madah pekara nya senutuk enggau pekara ke dikearap raban kolej nya ti deka meda kolej sida ulih nyadi institusi pelajar ke lebih bekualiti dudi hari.
“Kitai udah nerima mayuh agih belanja ari perintah dikena ngangkatka agi perengkaguna ba Kolej Pom Enam Saratok.
“Kesatu iya nya deka ngaduka wayar karan begunan Blok Sains ke beungkus urung RM200, 000,” ku iya.
Iya madah munyi nya maya bejaku ba Pengerami Anugerah Kolej Pom Enam Saratok (KTES) Ke-19 ditu, apin lama.
Nangkan ke nya, ku iya agih belanja ungkup PIBG asil genap sen ke diberi sida deka dikena ngemansangka agi KTES ulih semina ari sukut akademik enggau perengkaguna aja tang mega pekara bukai ke bekaul.
Ba pengerami nya, urung 158 iku nembiak KTES mujur nembuka pelajar sida sereta bela udah nerima setipikit diri.-TVS
