BINTULU, 8 Feb: Sukung enggau embing ti diberi apai indai ngagai anak sigi beguna dalam nentuka pemujur anak dalam bidang pelajar baik nya ari aspek akademik tauka kokurikulum.
Menteri ba Opis Premier Sarawak, Dato Sri John Sikie Tayai madahka, pemujur anak dalam sekula belabuh ari ruang bilik ti ngemeratka pelajar.
“Apai indai mesti nempa kaul ti rat enggau pengajar di sekula.
“Nengah pelajar ke meruan anak bisi daya nyapai pemujur enggau ulih mantu ngemanahka tikas ekonomi ruang bilik diri,” ku iya madah rambau Program Anugerah Nembiak Lati Sesyen 2023/2024 SK Tatau lebuh Hari Tiga.
John Sikie ke mega Kaban Kunsil Nengeri (ADUN) Kakus nerangka, ngatur program meri anugerah enggau perais ngagai anak ti mujur dalam pelajar ba sekula siti chara dikena meri pengaga enggau peransang ngagai nembiak.
“Nya alai, enda salah ga apai indai meri perais ngagai bala anak sida ti udah nyapai pemujur ngambika nyadi peransang. Ukai semesti perais nya tadi mata duit tauka barang ke berega,” tandu iya.
Iya madahka, perintah Sarawak endang bisi juluk deka nempa nembiak enggau rebak dudi ke ngembuan penemu sereta pengelandik ti tinggi dalam bemacham bidang.
“Juluk kitai iya nya manggai taun 2030, Sarawak nyadi nengeri bepenatai pemisi tinggi seraya penatai ruang bilik rayat kurang lebih RM15,000 sebulan.
“Asil ti ditaga tu ulih dijapai enti anak kitai pandai besekula enggau bisi pengelandik, lebih agi sida nerima gaji pemadu kurang iya nya RM4,000 sebulan,” ku iya madah agi.
Beduduk enggau nya, iya nyemetak madahka bisi enam taun agi tinggal sebedau datai ba taun 2030.
Nya alai, enti ulih dalam siti ruang bilik bisi dua tauka tiga iku anak mujur nampung pelajar nyentuk datai ba tikas Degree.
Beserimbai enggau program nya, Anugerah Apai Indai Proaktif 2023/ 2024 diberi ngagai Demit Ngong.
Nangkanka nya, Anugerah ‘Tokoh Murid’ SK Tatau diberi ngagai Irvan Marcell Egai pengudah iya nyapai mayuh pemujur sepemanjai taun.
Irvan nerima setipikit enggau perais mata duit penyampau RM2,000 ti diberi Dato Sri John Sikie Tayai.-TVS
