SRI AMAN, 8 Feb: Opis Menteri Betanam Betupi enggau Jamin Pemakai (KPKM) udah netapka rega minimum meli padi di Sabah enggau Sarawak penyampau RM1,300 per tan metrik.
Menteri ke nguasa KPKM, Datuk Seri Mohamad Sabu madahka rega minimum padi ti ditetapka nya deka diteritka berengkah ari 15 Februari 2024 ke nyadi siti chara dikena nyemakaka rega ba kedua-dua nengeri nya enggau Semenanjung.
Naka diatu, rega meli padi di Sabah enggau Sarawak agi baruh iya nya ba taka entara RM900 nyentuk ke RM1,100.
“Pengawa nyeririska rega minimum meli padi di Sabah enggau Sarawak sereta Semenanjung tu seraris enggau juluk opis menteri nya ti deka nambahka pengeluar beras menua,” ku iya madah rambau program nemuai ke Tibang Padi Batang Lupar ba Diwan Nangkai Stumbin lebuh Hari Empat.
Nangkanka nya, iya mega ngemendarka pakej bantu mekanisasyen ngagai sekeda serikat pemungkal ba baruh Program SMART Sawah Berskala Besar (SBB) di Tanjung Bijat enggau Koperasi Pertanian Sri Aman Berhad ti nguna kos penyampau RM810,000.00.
Mohamad mega minta pemekuh industri nempa kerejasama ti rat enggau perintah ke tau negapka aspek jamin pemakai di Malaysia.
Iya nerangka, perintah besai semampai meransang perintah nengeri enggau graduet universiti ngaul diri ngemansangka sektor nya seraya bisi daya mantu nambahka produktiviti padi lebih agi di Sarawak.
Ku iya madah, pemujur program nya beguna amat dikena nentuka bekal pemakai dalam menua seruran chukup enggau tejamin sereta nya ngurangka Malaysia kelalu bepanggai ba import beras burak.
“Nya alai, pekara ti ngaul jamin pemakai tu semua kitai mesti besaup begulai enggau graduet tauka perintah nengeri dalam ngemujurka program tu.
“Beras iya nya pemakai ninting hari rayat Malaysia. Taja pan udah lama ngaul diri ba pengawa ngeluarka padi enggau beras, menua kitai diatu agi bepanggai ba beras burak import,” tandu iya.
Temuai bukai ke bisi ngulu program nemuai nya Sapit Menteri Betanam Betupi enggau Jamin Pemakai Datuk Arthur Joseph Kurup, Sapit Menteri Industri Pemakai, Komoditi enggau Pemansang Wilayah Sarawak Datuk Dr Abdul Rahman Ismail sereta Chairman Sri Aman Development Agency (SADA) Datuk Seri Rohani Abdul Karim. – TVS
