BETONG, 8 Feb: Pemansang ba menua pesisir ke ulih nyaup ngangkatka pengerembai ekonomi rayat seruran dikemeratka Perintah Sarawak.
Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh madah, beduduk ari nya pengawa ngelasi tanah ungkup aktiviti pemansang endang pekara ke enda ulih diseliah.
“Pengawa ngemansangka tanah endang siti pekara ke ulih diseliah dikena nentuka pemujur sesebengkah projek pemansang enggau ke pemaik mensia mayuh.
“Nya alai, perintah patut ngelasi tanah baik tanah NCR tauka ukai endur bejalaika projek pemansang infrastruktur,” ku iya.
Tandu iya, tu kebendar endang ungkup pemaik mensia mayuh ngambika sama ngasaika pengelantang nguna perengkaguna ke lebih menyana,” ku iya.
Len madah munyi nya maya pengawa Nyuaka Chek Pampas Tanah Ungkup Projek Jalai Baru ari Rumah Panjai Maja ke Penurin enggau Jalai Akses ari Jambu Krampak ke Rantau Layang di Dewan Layar Opis Pelilih Betong empai lama ke udah.
Sama bisi pengerami tu Sapit Menteri Nembiak, Lumba enggau Pemansang Pedagang, Dato Gerald Rentap Jabu, Kaban Parlimen Betong, Dr Richard Rapu, Sekretari Politik Premier, Roselind Mapong Sabai enggau bala tuai sereta ejensi opis perintah. – TVS.
