MIRI, 8 Feb: Apai indai diperansang terus meri anak sida peluang mekuhka pekara ke dikerindu bala anak nyentuk ke pengawa nya tau nyadi batang pengawa sida dudi hari.
Sapit Menteri Dagang Temuai, Industri Kreatif enggau Seni Pemerindang Datuk Sebastian Ting Chiew Yew madah tu nyangka ulih ngansah bakat ke dikembuan sida lalu mai nama sida nyentuk ngagai tikas antarabansa.
“Tebal agi apai indai deka meda anak sida nyadi injinir, doktor, gawa tradisional. Nyadi pejenaka asai aku enda tentu tampak ditu.
“Deka bejaku senentang pekara tu, manah agi ngelakka anak kitai neruska pengawa nama utai dikerindu sida.
“Nuan enda kala nemu sida pengujung deka nyadi tebilang.
“Engka sida deka berengkah ari Miri, udah nya Sarawak, tang pengujung iya sida nyangka deka tebilang enggau diaku ba serata dunya,” ku iya.
Iya madah munyi nya maya aum pemberita Kumarsutra Nationwide Miri enggau Kuching, pagi tadi.
Berebak enggau nya, iya mega madah opis menteri iya deka ngatur mayuh agi program nyengkaum betikas antarabansa dikena matak mayuh agi temuai datai ke Sarawak.
Pekara tu dikena nyapai saran penatai temuai ke Sarawak manggai 4 juta iku dalama taun tu pengudah nyadi saran lebih 3 juta iku taun nyin kemari enggau penyampau ke mujur dijapai iya nya urung 3.9 juta.-TVS
