DEBAK, 5 Feb: Penyampau Tuai Raban Bansa Bansa Enggau Tuai Rumah (KMKK) lebih agi baka tuai tumpuk pendiau ba sitak Kunsil Nengeri (DUN) Saribas dikearapka ulih ditambah enggau lengkas.
Sapit Menteri Pemansang Indu, Anak Mit Enggau Pengelantang Komuniti Sarawak, Datuk Mohd Razi Sitam madah, tu beduduk ari bisi sekeda genturung pendiau diperati ngembuan penyampau rayat kelalu mayuh ngujungka meri pemar ngagai tuai tumpuk pendiau bejalaika pengawa enggau lebih ngasi.
“Bisi sekeda tumpuk pendiau ke patut ditambahka ari sukut penyampau tuai tumpuk pendiau laban bisi sekeda tumpuk pendiau ba sitak aku (DUN Saribas) tu ngembuan rayat ke mayuh tang semina dipegai siku aja tuai.
“Nyadi nya chukup beguna…pengawa nambahka kuota Tuai Tumpuk Pendiau dikena nangkup peminta sekeda tumpuk pendiau baka di Kampung Tuie, Kampung Supa.
“Pia mega ba Kampung Manggut, Kampung Serabang nyadi tumpuk pendiau tu majak besai enggau betambah ari sukut rayat sida,” ku iya.
Razi ke mega Kaban Kunsil Nengeri (ADUN) Saribas mansutka pekara nya nyerumba Pengerami Jasa Nuan Dikenang diatur Kelab Pengelantang Pendiau KMKK Saribas ba Dewan Millenea, ditu empai lama.
Ba pengerami nya, Mohd Razi bisi nyuaka tepa enggau setipikit ngagai lima iku tuai tumpuk pendiau enggau tuai rumah ari DUN Saribas ke nadai agi disambung pengawa.
Lebuh nerang silik, Mohd Razi madah peminta nambahka penyampau KMK di DUN Saribas udah dianjung ngagai raban bekaul tang apin nerima sebarang timbal.-TVS
