SARATOK, 5 Feb: Sepenyampau RM10 juta udah diungkup dikena bejalaika Projek Betanam Betupi ngemanahka jalai kebun ba baruh Ejensi Pemansang Bagi Menua Betong (BDDA) ungkup sitak Kunsil Nengeri (DUN) Krian Renggat Ke-2.
Kaban Kunsil Nengeri (ADUN) Krian, Friday Belik madahka, semua projek nya diatu dalam proses nyendiaka rintai kepenudi ti ditaga deka berengkah abis laun bulan tujuh taun tu.
“Ungkup renggat kedua kitai udah ngungkupka penyampau RM10 juta dikena bejalaika mayuh agi jalai kebun di sitak DUN Krian.
“Kami dalam proses nyendiaka rintai lalu ngarap ulih dipejalai taun tu abis laun bulan Julai taun 2024,”ku iya.
Iya mansutka jaku nya rambau Program Nyerahka Taba 10 Projek Betanam Betupi ba Baruh Ejensi Pemansang Bagi Menua Betong (BDDA) ditu pagi tadi.
Ku terang Friday, penembu projek nya ila dikearap ulih ngemudahka raban pekebun mit di DUN Krian mai asil utai tanam sida pansut ari kebun tauka umai sida.
Ungkup renggat keterubah, sepenyampau RM6.5 juta udah diungkup dikena ngemanahka jalai kebun di sitak DUN Krian.
Projek renggat keterubah, diatu udah berengkah enggau ditaga tembu bulan Julai tu ila iya nya digaga pengelama lima bulan nitihka timpuh asal.-TVS
