BETONG, 3 Feb: Sitak Spaoh deka terus dikemansang nengah Projek Ngaga Tebing Ai beungkus RM20 juta ringgit ditangkan Projek Ngaga Medan Selera (makit) enggau Pasar Malam ke beungkus RM5 juta.
Sapit Premier Sarawak, Datuk Amar Douglas Uggah Embas madah, ketiga-tiga projek nya bela deka berengkah digaga taun tu.
“Kitai mega deka ngaga nambahka makit iya nya Medan Selera enggau Pasar Malam beungkus RM5 juta, bela udah dikemendar lalu deka berengkah digaga taun tu.
“Nangkan ke nya, kitai deka nangkir tebing ai ke lebih besai agi ba ujung Kampung Spaoh din nyadi utai nya udah diperunding udah diberi agih belanja RM20 juta.
“Jemah kitai deka meda rampa menua Spaoh berubah lebih manah enti nyema projek tebing ai tu udah tembu,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya nyerumba Pengerami Ngedut Kaul Gong Xi Fa Chai 2024 diatur Serakup Tiong Hua Spaoh di Dewan Masyarakat Spaoh, malam tadi.
Ku terang Uggah, nengah penembu Projek Tebing Ai nya ila dikearap ulih matak mayuh agi penatai temuai ari luar datai ke Spaoh seraya nyungkak ekonomi komuniti ti mekuhka pengawa bedagang.
Projek bukai ke bela dikeandal ulih nyungkak sektor dagang temuai sereta deka digaga ba Spaoh taun tu iya nya Projek Ngaga Baru Replika Kubu Rentap ba Bukit Sadok nengah agih belanja RM16 juta.-TVS
