BETONG, 3 Feb: Tiga buah palan hemodialisis baru beungkus RM15 juta deka digaga ba tiga kandang endur di pelilih Betong ba taun tu.
Sapit Premier Sarawak, Datuk Amar Douglas Uggah Embas madah, tiga kandang endur tu iya nya Kampung Spaoh, Kampung Beladin enggau Kampung Kabong.
“Ketetiga genturung pendiau tu endang udah bisi palan hemodialisis nyadi BDDA udah setuju iya nya kitai deka ngaga ba taun tu.
“Nyadi ungkus ngaga palan tu iya nya RM5 juta siti,” ku iya.
Iya madah munyi nya maya dirandau raban media pengudah ngulu Program Randau Pelajar Bukit Saban diatur ba Spaoh, pagi tadi.
Uggah ke mega Kaban Kunsil Nengeri (ADUN) Bukit Saban nerang, pekara nya udah dikerandau enggau diputuska ba aum kaban komiti Ejensi Pemansang Bagi Menua Betong (BDDA) empai lama ke udah.
Udah nya ku iya, bisi mega perambu ngemanahka palan hemodialisis ke udah bisi ba Kampung Debak diperati udah luya.-TVS
