BETONG, 3 Feb: Atur terit ti dipejalaika Opis Menteri Pelajar Malaysia (KPM) ngagai pengari rayat entara kebuah besai bantu tusah deka diberi ngagai sekula di nengeri tu.
Sapit Premier Sarawak, Datuk Amar Douglas Uggah Embas madah, pekara nya mega udah nyadi ba iya empu lebuh dipinta ngaga peminta betulis nuju KPM semina ketegal deka mantu masang irkon ti meri pengelantang ngagai raban Sekula Sekondari (SMK) Spaoh apin lama ke udah.
“Suba nyamai kitai ulih meri terus diatu undang-undang baru nyadi aku diasuh nulis surat nuju opis menteri dikena madah deka minta sekalika aku ulih meri tauka enda.
“Kebendar penanggul tu ukai pengari rayat (YB) enggai nulung tang tu mih kelikuh iya bisi penanggul mimit kitai deka nulung.
“Enti ulih endang patut kitai nulung laban deka nentuka bala anak kitai mujur,” ku iya.
Iya madah munyi nya rambau Program Randau Pelajar Bukit Saban Diatur diatur ba Dewan Sinaran SMK Spaoh, ditu pagi tadi.
Uggah mega bisi meransang semua raban sekula nya enggau apai indai anang leju meransang anak mujur ba pelajar lebih agi ba bidang Sains, Teknologi, Injiniring enggau Matematik (STEM).
Ku iya, perintah nengeri Sarawak endang begunaka raban tebangkar dalam bidang STEM jemah ila.-TVS
