DEBAK, 1 Feb: Bisi 24 buah projek deka meri empas besai dipejalaika ba baruh Ejensi Pemansang Bagi Menua Betong (BDDA) di sitak Kunsil Nengeri (DUN) Saribas.
Kaban Kunsil Nengeri (ADUN) Saribas, Datuk Mohd Razi Sitam madahka, entara projek ke bekaul nyengkaum projek ngemanah jalai kebun sereta projek ti bekaul enggau sistem sapat bah.
“Entara iya, projek ti meri empas tinggi, ti begunaka kos ti besai, tebal agi ke ngaul Projek Sapat Bah enggau mega Projek Jalai Kebun.
“Udah nya, projek ngemanah jalai ti diguna komuniti ba ditu (ninting hari) ke pengelantang pengani ke diau besemak,” ku iya.
Razi ke mega Sapit Menteri Pemansang Indu, Anak Mit enggau Pengelantang Komuniti Sarawak madah munyi nya pengudah Pengawa Nyerahka Baru Taba Projek Ngagai Pengani ba Rumah Panjai Seli Ali, Munggu Tunggal, ditu empai lama.
Tandu iya, raban iya mega nempa kerejasama enggau Ejensi Pemansang Ekonomi Sarawak (SEDC) dikena bejalaika sekeda projek pemansang ekonomi ba sitak Saribas.
Tu nyengkaum projek ngaga premis dagang ba makit Debak sereta numbuhka projek pemansang pengawa betanam betupi ke meri empas tinggi.-TVS
