SARATOK, 30 Jan: Semua 14 buah sekula primari enggau sekondari ba sitak Kunsil Nengeri (DUN) Kalaka deka terus dibantu.
Kaban Kunsil Nengeri (ADUN) Kalaka Mohamad Duri madahka, bantu ungkup semua sekula nya deka diteruska nengah projek Transformasyen Menua Pesisir (RTP) enggau projek Mit Pemansang Menua Pesisir (MRP) DUN nya.
“Palan servis deka terus mantu sapa aja nembiak ari DUN N.38 ke mujur nampung pelajar sekalika nya ba tikas setipikit, diploma enggau ke bukai sechara ‘one-off’ sepenyampau RM250.
“Baka ke dipeda ba Sekula Abang Abdul Rahman iya nya bantu ngagai RTP enggau MRP projek RM43,000 enggau SMK Agama pun bulih mikrofon ke baru ungkup bilik aum SMK BM enggau tu dibantu ari RTP tauka MRP.
Semua sekula di dalam DUN N.38 deka dibantu sechara begintir,” ku iya.
Iya madah munyi nya pengudah tembu Program Khatam Al-Quran diatur ba Masjid Al-Muhtadin Saratok lebuh Hari Minggu.
Di DUN Kalaka bisi tiga buah sekula sekondari, 10 buah sekula primari enggau sebuah sekula Kolej Pom Enam iya nya Kolej Pom Enam Saratok (STES) enggau 3,903 iku nembiak.
Kenyau taun 2022 nyentuk ke diatu, bisi RM160,000 udah dipelanja ungkup bantu ngagai nembiak ari sitak DUN ke mujur nampung pelajar ngagai renggat tinggi.-TVS
