SIBURAN, 30 Jan: Siku anak mit indu beumur setaun tiga bulan tepekul dalam sebuah kerita pengelama 12 minit ba mua sebuah palan bebeli barang di Siburan mujur diselamatka Tim Bravo ari Balai Bomba enggau Penyah Penusah (BBP) Siburan, lemai tu tadi.
Tuai BBP Siburan Penulung Penguasa Bomba (PPGB) Nazry Mohamat madah raban sida berumban ngesah palan penusah nyadi sepengudah nerima kangau tasah ari apai anak mit nya ti nusuika anak iya tepekul dalam kerita iya empu urung pukul 1.24 minit lemai.
Bekau ari nya, ku terang Nazry raban sida betubuh tiga iku pegawai ngena trak FRT Scania enggau sebuah van ERMS ngelawa palan penusah nya.
“Seninjik datai ba endur nya sida amat meda bisi siku anak inud beumur urung setaun lebih tepekul dalam kerita semak 12 minit.
“Raban bomba terus nguji muka pintu kerita nya, udah nya urung empat minit sida mujur muka pintu kerita sereta ngambi anak mit nya pansut,” ku iya.
Beduduk ari nya, Nazry ngelalau bala apai indai tauak sebarang orang ke bisi mai anak mit ngagai dedini endur patut nentuka cheremin kerita dibuka mimit nyema deka pansut enda lama ari kerita dikena nyeliahka penusah enda disadang nyadi baru baka kes kerita tekunchi automatik,ku iya.
“Pesan aku nuju apai indai tauka barang sapa orang ke bisi mai anak mit tentuka bala anak enda pansut sengapa sekalika nya kita benung kiruh bepunggah ke barang,” ku iya.-TVS
