SIBU, 28 Jan: Sekeda projek dibaruh kemata Ejensi Pemansang Delta Rajang (RADDA) ungkup sitak Kunsil Nengeri (DUN) Meluan dipelaba deka berengkah sebedau Gawai Dayak.
Kaban Kunsil Nengeri (ADUN) Meluan Rolland Duat Jubin madah, projek nya mungkur pemansang infrastruktur baka jalai raya nuju menua pesisir, ngaga diwan enggau nyelapat tebing sungai.
“Ungkup Meluan, pengari rayat (aku) bisi nerima RM100 juta ungkup pemansang infrastruktur lebih agi dikena ngaga jalai, diwan, (sapat) waterfont.
“Tu endang siti pekara dikemerat bepelasarka pematut YB (siku-siku pengari rayat perintah) nyadi agih belanja nya deka dikena ngaga diwan, waterfront enggau mega jalai di sitak menua pesisir,” ku iya.
Iya madah munyi nya maya dirandau media pengudah ngulu Pengerami Ngintu Taun Baru China diatur Parti Demokratik Progresif di sebuah hotel tebilang ditu, malam tadi.
Ku terang Rolland, enti nitih ke aum projek tu patut berengkah taun tu iya nya paling tumu pan nyangka tengan taun tu tauka berengkah dipejalaika sebedau Gawai.
Komiti RADDA ti betuaika Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh diberi tanggungpengawa ngangkatka pemansang ba 11 sitak nyengkaum di Sarikei enggau Mukah nengah agih belanja manggai RM1.5 bilion ari perintah nengeri.-TVS
