SIBU, 28 Jan: Tuju kerejasama Parti Demokratik Progresif (PDP) enggau Parti Sarawak Bersatu (PSB) ukai dikena ngerampas penuduk tang ke pemaik semua sereta negapka agi penyerakup politik.
Sapit Presiden PDP, Datuk Henry Harry Jinep madah beduduk ari nya sida ngelempaika penuh ngagai pemintar tuai Gabungan Parti Sarawak (GPS) mutarka pekara bekaul enggau isu pengempu penuduk Kunsil Nengeri (DUN) dudi hari.
“Enti kitai deka bekerajasama kitai bekerejasama chara penuh lalu ukai pilih ketegal penuduk tauka enda tang kitai bekerejasama chara penuh dalam siti gempung.
“Enda ngira sekalika nya di (DUN) Engkilili, Bawang Assan tauka Ba’Kelalan enggau ke bukai.
“Enti sida (PSB) deka bekerejasama enggau kitai nyadi siti pelasar dikena nyukung perintah GPS kitai PDP sigi tebuka (nerima),” ku iya.
Iya madah munyi nya maya ditanya raban media pasal penuduk DUN ke dipegai pengari rayat PSB diatu pengudah ngulu Pengerami Ngintu Taun Baru China 2024 diatur PDP Pampang Dudong ditu, malam tadi.
Naka tu bisi tiga penuduk DUN diarika pengari rayat PSB iya nya dun Engkilili, Bawang Assan enggau Ba’kelalan.
Lebuh nerang silik pasal penuduk, ku Henry iya enda ulih nimbal nyemetak laban pekara nya diluar kuasa iya.
Iya madah pekara dilempai ngagai raban tuai GPS tauka Premier Sarawak laban niat sida bekerejasama endang ukai deka ngerampas penuduk.
Ku Henry, niat kerejasama nya ungkup tuju pengelantang enggau dikena negapka agi penyerakup dalam GPS.-TVS
