SIBU, 28 Jan: Langgur penemu ti minta numbuhka siti palan khas ungkup ngempuruka keresa pesaka di nengeri tu endang buah penemu ke manah, ku Friday Belik.
Kaban Kunsil Nengeri (ADUN) Krian nya madah, berebak ari nya iya merambu deka ngasuh siti Galeri Pesaka Iban dipasuk dalam Projek Diwan Baru Saratok.
“Kitai chukup nyukung langgur penemu ke dibantaika Profesor Dr Neilson Ilan, iya nya ngarapka bisi ditumbuhka siti palan endur ngempuruka keresa pesaka ke chukup berega.
“Kebendar ba perambu ngaga Diwan Baru di Krian, Saratok ila siti komponen nya kitai deka bisi siti galeri dia ngambi ulih endur nyimpan keresa pesaka kitai lalu dipandangka nyadi pesaka kitai Iban di Saratok,” ku iya.
Friday mansutka penemu nya lebuh nimbal langgur penemu dipansutka Dekan Fakulti Sains Dan Kemanusiaan Universiti Malaysia Sarawak (UNIMAS) Profesor Madya Dr Neilson Ilan Mersat ti ngarapka siti palan nyimpan reta pesaka ditumbuhka nengeri tu.
Perambu nya tebantai bekau ari siti video ke mayuh dikerembaika ba media rama mandangka ulah sekeda raban ari sebuah rumah panjai dipeda nunu tajau ke dipenggi sida empu, apin lama ke udah.-TVS
