SARATOK, 27 Jan: Raban bansa Iban ti bisi penyiru enggau sayauka keresa lama endang diperansang terus ngibun manah reta pesaka nya baka digempuru ba ‘bilik tuai’ ngambika meruan bisi dipeda purih pantis sida ke nampung pun bilik penaik.
Dekan Fakulti Sains Sosial Dan Kemanusiaan Universiti Malaysia Sarawak (UNIMAS) Profesor Madya Dr Neilson Ilan Mersat madahka, reta pesaka nya mega mandangka identiti sereta kelai bansa ti ditampung, ditali ari aki ini kelia menya ngambika meruan bisi dipeda nyentukjemah ila.
“Bansa kitai Iban tu endang sigi chukup siru enggau pesaka. Ambika chunto sida nadai pesaka nya nurun pegi begiga pesaka awak ke bisi disimpan sereta dipeda bala anak uchu ichit wit diri.
“Nyadi pesaka tu mayuh macham baka tajau, bedil, tawak, bebendai, sumpit, tanduk rusa enggau ke bukai.
“Pia mega ubat padi ulih nyadika pesaka diintu diibun kitai ari peturun siti ngagai peturun siti,” ku iya.
Iya madah munyi nya lebuh dipinta meri timbal bekaul enggau siti video ke mayuh dikerembai ba laman rama bekaul enggau pengawa orang ke nunu tajau be sebuah rumah panjai bedau lama ke udah.
Iya nerangka, bilik tuai nya tadi deka nyadi siti endur alai nyimpan seraya mandangka keresa lama enti nyema reta nya enda dibagi enggau diri sebilik ke bukai.
Dulu ari tu, Dr Neilson mega bisi merambu minta raban bekaul patut numbuhka siti palan khas tauka mini muzium endur ngempuruka keresa lama ngambika keresa lama enda dipunas tauka ditempaya sengapa.-TVS
