KANOWIT, 27 Jan: Siti komiti deka ditumbuhka mantu ngelanggur program dagang dikena ngangkatka ekonomi rayat di sitak Kunsil Nengeri (DUN) Ngemah.
Kaban Kunsil Nengeri (ADUN) Ngemah Anyi Jana madahka, komiti nya ukai semina ngesan tangkup pengawa ngelanggur program tang matau perayat ba sitak nya ti deka mekuhka pengawa dagang nyentuk ke sida teulihka pemujur.
Ku iya, nengah komiti nya sida nyaran deka meda mayuh agi pedagang ngaul mayuh bidang di DUN Ngemah seriris enggau juluk ngangkatka pemansang ifrastruktur, ekonomi, pelajar enggau raban nembiak.
“Ambika banding agih RM100,000 ari MRP pengari rayat. Ari RM100,000 nya tadi, aku ngasuh sida survei nyangka kitai berengkah ari 20 iku pedagang.
“Nyangka ukai bidang tu aja tang nya mesti dipatau (komiti sanding pedagang) awakka bantu dikena meruan,” ku iya.
Iya mansutka jaku nya rambau Woksyop Krafjari Sugu Tinggi ti diatur Roselind Ngali ari Mitz Ejensi ba Librari Mensia Mayuh Opis Kaunsil Pelilih Kanowit, ditu kemari.
Woksyop nya diatur pengelama tiga hari sereta bisi digulu 22 iku penyereta seraya nyadi pelasar nempa pengelandik dalam ngaga sugu tinggi.
Ku iya, ba awak ke sama, pengawa nya mega muka peluang ngagai penyereta numbuhka kedai diri empu tauka belajar chara nyual produk asil jari nengah tali arus (online).-TVS
