SARATOK, 26 Jan: Siti palan khas endur ngempuruka keresa lama patut ditumbuhka ba nengeri tu dikena nyimpan keresa lama ari ke dipunas tauka ditempaya ngapa.
Dekan Fakulti Sains Sosial enggau Kemanusiaan Universiti Malaysia Sarawak (UNIMAS) Professor Madya Dr Neilson Ilan Mersat madahka, pemisi palan khas tu chukup beguna ngambika semua keresa lama ulih digempuru, meruan diibun sereta bisi dipeda nembiak rebak dudi.
“Dunya diatu udah mansang nyadi chara idup kitai pan udah berubah lalu pia mega utai ke lama mega mayuh nadai dikena kitai agi.
“Tang ba penemu aku, ari keresa lama nya dibuai tauka ditempaya ngapa nyentuk ke ditunu.
“Nyadi manah agi enti kitai bisi palan khas alai nganjung keresa lama tu laban nya keresa pesaka aki ini kitai kelia,” ku iya.
Iya madah munyi nya lebuh dipinta pengari TVS meri timbal bekaul enggau siti video ke mayuh dikerembai ba laman rama bekaul enggau pengawa orang ke nunu tajau be sebuah rumah panjai bedau lama ke udah.
Lebuh nerang silik ku Neilson, bisi bala Iban ke siru ngagai pesaka bansa diri sida endang semampai bejalai begiga awakka keresa lama nya bisi disimpan sereta ulih dipeda anak uchu ichit wit dudi hari.
“Sekeda ari pesaka kitai Iban ke patut diibun manah baka tajau, bedil, tawak, bebendai, sumpit, tanduk rusa enggau ke bukai.
“Pia mega ubat ke manah nadai mega salah diibun ambika banding baka ubat padi laban nya pesaka ke ulih ditampung ngagai siti peturun ke peturun siti,” ku iya seraya madah pengawa nya kelia suah agi diibun orang ke nguan bilik tuai.-TVS
