SARATOK, 26 Jan: Projek ngaga Jematan Sungai Krian nuju ke Kampung Kupang ditu ke nguna kos penyampau RM90 juta ditaga deka masuk proses tinda ba suku kedua taun tu.
Sapit Menteri Pemansang Infrastruktur enggau Pemansang Penyangkai Kapal Sarawak, Datuk Ir Aidel Lariwoo madahka, projek nya nyerangkung ngaga sebuah jematan semin sepanjai 300 meter sereta jalai nuju kampung kupang sepanjai 3 kilometer.
”Projek tu udah dikemendarka ba dalam sekeda RP sebedau tu iya nya Rolling Plan RMK-12.
“Urung RM90 juta belanja udah dikemendar dikena ngemujurka projek tu nyengkau dikena ngaga jalai tiga kilometer pemanjai enggau jematan sepanjai 300 meter,” ku iya seraya madah projek tu deka ditinda ngambika ulih digaga ba suku kedua taun tu 2024.
Aidel madah munyi nya pengudah ngabas taba Projek Jematan Sungai Krian nuju ke Kampung Kupang ditu lebuh Hari Empat.
Ku terang Aidel, Opis Kereja Raya (JKR) udah dipinta nyeruri jalai nya ngambika meri pengelantang ngagai perayat seraya nganti kereja ngaga projek nya berengkah.
Lebuh ngelansa projek bukai, Aidel madahka, Projek Jalai Bajau-Kupang sepanjai lebih kurang 16.9 kilometer ke beungkus RM90 juta mega deka ditinda ba suku kedua taun tu.
Dulu agi ari nya, Aedil disempung Kaban Kunsil Nengeri (ADUN) Kalaka, Mohd Duri bisi limpang ngabas siti agi taba Projek Jematan Sungai Krian di Pusa.-TVS
