SARATOK, 26 Jan: Projek Jematan Sungai Krian ke benung digaga diatu diperati dulu ari timpuh ke udah ditaga.
Sapit Menteri Pemansang Infrastruktur enggau Penyangkai Kapal Sarawak, Datuk Ir Aidel Lariwoo madah, bepelasarka timpuh asal projek nya mungkur pengawa ngaga jematan 690 meter pemanjai meraka Sungai Krian sereta pengawa ngaga jalai raya 1.956 kilometer pemanjai beungkus RM112, 499, 580 ditaga tembu bulan Ogos 2025.
“Pemansang Projek Jematan Sungai Krian dipeda tembu 41.58 peratus dibanding 41.45 peratus ungkup timpuh asal.
“Nyadi kami berasai gaga ati meda pemansang projek tu lalu ngarapka kunteriktor ulih nembuka projek sebedau timpuh ke ditaga iya nya sebedau Ogos 2025,” ku iya.
Aidel mansutka pekara ngagai raban media pengudah pejalai ngabas Taba Projek Jematan Sungai Krian ditu, kemari.
Projek Jematan Sungai Krian sebedau tu kala dikategorika siti ari projek sakit.
Pekara nya dipelaba ketegal kabel karan ke bisi dalam tasik ti nekul raban Opis Kereja Raya (JKR) Sarawak bejalaika pengawa.
Beduduk ari nya, projek bisi tejanggal enda lama, ku iya.
Aidel madah, dikena mutarka pekara nya dia raban ari Opis SESCO udah bejalaika pengawa mindahka kabel.
Projek nya tejanggal sebedau tu mega beduduk ari pangkat Covid-19,ku iya.-TVS
