KUCHING, 25 Jan: Pemisi Diksionari Salin English-Iban dipeda bisi daya mantu negapka agi sepil jaku Iban ngambi nyadi malin mensia mayuh ba semua renggat umur, tauka bansa bukai.
Kedu Sekretari Politik Kepala Menteri, Edmund Stanley Jugol madahka, iya chukup gaga laban Institut Penarak Pengajar Kampus Rajang enggau kerejasama Gerempung Pemansang Pelajar Jaku Iban (AEDIL) sereta Institut Penarak Pengajar Kampus Batu Lintang udah mujur nyelak diksionari ti beguna amat dalam jeman diatu.
“Aku endang temegah enggau nyukung pengawa nyelak diksionari nya ti manah amat dalam mantu ngidupka agi jaku Iban.
“Diksionari baru ti dichelak Dr. Lambat Lindong (penyeraris projek) enggau raban tebangkar ke bukai nya ngundan leka jaku baru tauka moden ti dikena orang kemaya hari ti nadai dipasuk ba dalam diksionari lama,” ku iya madah rambau dirandau pengarang berita ba opis TVS.
Edmund nerangka, sebedau tu mayuh diksionari bukai udah dikarang enggau dichelak bala tebangkar bukai, tebal agi nengah Yayasan Tun Jugah ti suah dimalin mensia mayuh.
“Dunya majak moden, nya kebuah jaku Iban mesti mansang seraris enggau ubah pemansang nya ngambika terus relevan sereta diperetika,” tandu iya.
Iya madahka, pemisi diksionari ke baru beguna dalam bekunsika reti leka jaku Iban ti suah dikena orang sekalika dalam aspek pelajar, ngarang berita sereta ke bukai.
Nampung penerang ba dalam diksionari nya madahka, pasal semua diksionari ti udah dikeluarka, sereta asil penemu ke udah dikukun nengah pengawa nya , chukup manah dalam nyungkak pemansang sereta mintarka bungkur penemu kitai senentang jaku Iban.
Diksionari Salin English-Iban tu disaran ngagai sekeda raban penguna kelebih agi sida ti mekuhka pengawa akademik ngena jaku Iban tang napi penanggul ngiga leka jaku Iban ti ulih nipak mayuh leman leka jaku English.
Pugu objektif ngaga enggau nyelak Diksionari Salin English-Iban tu iya nya dikena ngiga sereta nempa tipak leka jaku Iban ba jaku English. – TVS
