BETONG, 23 Jan: Sapit Premier Sarawak Datuk Amar Douglas Uggah Embas ningkah jaku petenah ti ngumbai Perintah Sarawak bechiping enggau serikat ari China ke bisi bejalaika projek infrastruktur besai di nengeri tu.
Ku iya, pekara nya nyadi pengudah kunterik ngaga Projek Jematan Rambungan di Kuching diketuka empai lama ke alai projek nya bela digaga serikat ari China.
Nya alai, ku Uggah pengawa ngetuka kunterik nya berindik ari serikat ari China nya enda bejalaika projek lalu ngujungka nyadi projek sakit.
“Sida puntan mandangkan pemujur baka ti dikearap.
“Nya alai, kami ngetuka kunterik sida, baka ke digaga kami ngagai kunterikor ti bejalaika Projek Ngaga Jematan Rambungan,” ku iya.
Uggah ke mega Menteri Pemansang Infrastruktur enggau Penyangkai Kapal Sarawak madah munyi nya maya ngabas taba Projek Jematan Batang Saribas 2 di Beladin, empai lama.
Ku terang Uggah, kebendar projek nya bisi kaul enggau serikat China bisi penerang ngumbai Perintah Nengeri bechiping tang kebendar nadai.
Perintah nengeri semina bejalaika undang-undang dikena nentuka kunteriktor ngembuan tanggungpengawa nembuka projek baka ke udah ditimpuh.
Dulu agi ari nya, Uggah bisi ngabas taba ngaga Jematan Batang Lupar 1 enggau Jematan Batang Saribas 1.
Jematan Batang Lupar digaga enggau ungkus RM848,745 juta dipelaba tembu bulan November 2025.
Nangkan ke nya, Jematan Saribas 1 mega dipelaba tembu penuh kena April 2025 lalu Jematan Saribas 2 ditaga tembu bulan Ogos 2025.-TVS
