BETONG, 23 Jan: Rumah baru ungkup siku peranak Kampung Hulu Serembang, Spaoh ke dituntung penusah angus empai lama deka dientak ba taba tembawai angus rumah nya empu.
Kaban Kunsil Nengeri (ADUN) Saribas Datuk Mohd Razi Sitam madah, agih belanja dikena meli kereban dikena ngentak rumah baru nya udah diserahka iya empu ba pejalai ngabas tudah enggau sida sebilik empai lama.
“Kitai ngarapka pengawa ngaga rumah baru nya ulih dirumban ngambika tudah enggau sida sebilik sama ulih tama rumah baru nya sebedau Hari Raya,” ku iya.
Razi mansutka pekara nya maya dirandau pengari TVS maya ngabas seraya nganjung bantu ngagai sida ke dituntung penusah angus ba Kampung Hulu Serembang, Spaoh empai lama ke udah.
Dulu ari nya, tudah ke ngempu rumah angus iya nya Jais Leman nusui maya penusah nyadi iya enggau bini iya benung belelak ba dalam rumah.
Beduduk ari nya, iya enggau bini iya enda nemu kebuah penusah nyadi beduduk ari penyadi nya ke chukup jampat.
“Maya pekara tu nyadi, kami endang dalam bilik, enda nemu utai, (penusah) tu jampat endar nyadi,” ku iya.
Ba penusah ke nyadi kena Hari Enam minggu ke udah, sebuah rumah ba Kampung Hulu Serembang diuan 11 iku pengani angus lengis.
Nadai orang diripotka bakal tauka bebadi nyawa bekau ari penusah nya.-TVS
