SARATOK, 23 Jan: Opis Bomba enggau Penyah Penusah Malaysia (JBPM) Sarawak nyaran deka numbuhka urung 15 tim bomba komuniti ditu ungkup taun tu.
Tuai JBPM Saratok Penulung Penguasa Bomba Putra Ela madah, raban sida deka terus bekerejasama enggau pengari rayat sereta raban pemeri belanja dikena nyapai juluk nya.
“Kami (JBPM Saratok) nyaran ungkup Bomba Komuniti 2024 iya nya deka numbuhka abis nadai 12 nyentuk 15 iti tim bomba komuniti.
“Arapka pengawa tu ulih dikemujur,” ku iya maya dirandau media pengudah tembu Program Pemereti Ati enggau Pengelikun Ari Penusah Angus diatur Palan Servis ADUN Kalaka enggau SK Kupang, pagi tadi.
Ku terang Putra enda lama agi sekeda raban bomba komuniti deka ditumbuhka ba palan ke mayuh diuan komuniti Melayu nyengkaum ba Kampung Melango, Kampung Pagan, Kampung Tanjung enggau Kampung Bunga Raya.
Udah nya, iya madah raban Bomba Komuniti Kampung Kupang ke baru ditumbuh diatu udah bisi 45 iku kaban
Penyampau nya dikearapka terus nambah lebih agi ba raban nembiak ngambika sama besaup nyaga pengelikun genturung pendiau ari penusah ke enda disadang baka penusah angus.-TVS
