BETONG, 21 Jan: Bisi 11 iku diri sebilik lenyau palan endur diau pengudah rumah sida di kampung Serembang, Spoah angus lengis ba penusah ke nyadi lemai Hari Enam.
Taja pia, ba penusah ke nyadi urung pukul 5.30 lemai nya, semua raban ke dituntung penusah mujur nyelamatka diri.
Tuai Balai Bomba enggau Penyah Penusah (BBP) Betong, Vincent Baling Yabi madah, raban sida nerima kangau ngenyit senentang penusah nya urung pukul 5.53 lemai lalu ngerah 12 iku raban bomba ngesah palan penusah.
”Kena 20 Januari 2024 urung pukul 5.53 minit lemai, bilik operasyen Balai Bomba enggau Penyah Penusah Betong bisi nerima kangau ngenyit senentang penusah angus.
“Penusah nya diripot ke ngaul sebuah rumah bepalan ba Kampung Hulu Serembang Spaoh,” ku iya maya dirandau pengari TVS Saratok sehari tu tadi.
Beduduk ari nya, ku Vincent sida terus ngerahka 12 iku raban betuaika iya empu ngesah palan penusah.
Seninjik datai ba palan penusah, bisi sebuah rumah kayu pemesai 20 X 60 kaki udah angus lengis (100 peratus).
Ku terang Vincent, raban bomba ngambi timpuh urung sejam madamka api sebedau operasyen nya diketuka urung pukul 7.49 lemai.
Nadai orang diripotka bakal lalu kebuah penusah nyadi sereta anggar pengerugi agi ditasat.-TVS
