BETONG, 21 Jan: Sapit Menteri Pemansang Indu, Anak Mit enggau Pengelantang Komuniti Sarawak, Datuk Mohammad Razi Sitam udah nyuaka bantu tumu ngagai raban ke tasah angus ba Kampung Hulu Serembang pagi tadi.
Ku iya, bantu nya nyerangkung bantu barang ke diguna ninting gari, kereban dikena ngaga rumah enggau kereban sekula nyengkaum mata duit sepenyampau RM10,650.
“Bantu ke disuaka sehari tu iya nya kereban dikena ngaga rumah baru, bantu mata duit ke belanja sida nyengkam kereban dikena bala anak sida besekula.
“Kebuah pia laban bisi dua iku nembiak tu agi belajar ba sekula primari.
“Pia mega kami bisi mantu barang dapur nyengkaum barang pemakai rangkai lalu semua bantu tu manggai RM10, 650,” ku iya.
Razi ke mega Kaban Kunsil Nengeri (ADUN) Saribas madah munyi nya pengudah ngabas sida ke tasah angus ba Kampung Hulu Serembang ditu, pagi tadi.
Sama bisi nyempulang pejalai Razi iya nya Pegawai Pelilih Betong enggau SAO Spaoh.
Ke penerang, penusah angus ke nyadi pukul 5.30 lemai ba Kampung Hulu Serembang kemari udah nganguska sebuah rumah ke dipenggi Jais Leman, 69 taun.-TVS
