DEBAK, 20 Jan: Sebengkah aum deka diatur begulai enggau raban Opis Parit Enggau Entali Ai (JPS) endur berundingka chara pemadu manah dikena ngelengkaska projek sapat bah di Debak.
Sapit Premier Sarawak, Datuk Amar Douglas Uggah Embas madah, pekara nya mesti dirumban laban projek nya ulih mantu mutarka penanggul ampuh bah ke suah nuntung sitak nya.
Ku iya, projek nya diatu baru manggai semilan peratus lalu pengawa nya mesti dirumban.
Uggah ke mega Chairman Komiti Penyanga Penusah Nengeri Sarawak (JPBNS) madah diri berasai tepantup ati meda genap ejensi enggau bantu ke udah diberi ngagai raban sida ke tasah sereta benung ngenduh ba Palan Pengenduh Sementara.
“Penyampau sida ke tasah bisi 364 iku.
“Nyadi aku meda penyikap ke digaga opis-opis chukup manah lalu sida mega bisi diberi makai enggau disedia kereban ke diguna ke chukup baka kena tinduk enggau semua perengkaguna ditu chukup manah,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya ngagai raban media pengudah ngabas sida ke tasah bah ba dua PPS iya nya di PPS Diwan Millenea enggau PPS Diwan Perpaduan ditu, pagi tadi.
Berebak enggau nya, Uggah madah diri berasai tepantup ati enggau penyikap digaga semua opis ke bekaul dalam komiti penyanga bagi menua enggau pelilih menua ke bela datai ngesah.
Naka pukul 12.00 tengah hari tadi, bisi 364 iku sida ke tasah ari tiga genturung pendiau di Debak dianjung ngagai PPS sepengudah rumah sida ampuh ai.
Sama bisi nyempulang pejalai Uggah ngelawa PPS nya Sapit Menteri Pemansang Indu, Anak Mit enggau Pengelantang Komuniti Sarawak Datuk Mohd Razi Sitam, Kaban Parlimen Betong Dr Richard Rapu sereta ke bukai.-TVS
